វីដេអូស្ដែងៗ! ឆេះកប៉ាល់ដឹកមនុស្ស ២៧១ នាក់ ម្នាក់ៗភ័យផ្អើលហក់ចុះព្រាត នៅជិតកោះបាលី
កប៉ាល់ដ៏ធំមួយគ្រឿងផ្ទុកមនុស្ស ២៧១ នាក់ បានត្រូវអគ្គិភ័យឆាបឆេះនាកណ្ដាលសមុទ្រនៃកោះបាលី ប្រទេសឥណ្ឌូនេស៊ី។ ទោះជាយ៉ាងណា មិនទាន់មានរបាយការណ៍ណាបញ្ជាក់ពីចំនួនអ្នកស្លាប់ ឬ របួសនោះឡើយ ខណៈខាងអាជ្ញាធរកំពុងដុតដៃដុតជើងធ្វើការជម្លៀសអ្នកនៅលើកប៉ាល់នោះ។
កប៉ាល់ដឹកអ្នកដំណើរមួយគ្រឿងឈ្មោះ Mutiara Timur I ដែលដឹកអ្នកដំណើរចំនួន ២៣៦ នាក់ និងបុគ្គលិកចំនួន ៣៥ នាក់ ត្រូវអគ្គិភ័យឆាបឆេះនៅថ្ងៃទី ១៦ ខែវិច្ឆិកា ឆ្នាំ ២០២២ លើដែនសមុទ្រកោះបាលី នៅចម្ងាយប្រមាណ ១.៥ គីឡូម៉ែត្រពីឆ្នេរសមុទ្រ Karangasem។
តាមការបញ្ជាក់ពីប្រធានភ្នាក់ងាររុករក និង សង្គ្រោះនៃកោះបាលី បានឱ្យដឹងថា ក្រុមសង្គ្រោះជាច្រើន រួមទាំងទូកនាវិក និង អ្នកនេសាទក្នុងតំបន់ បានស្រាក់ដៃគ្នា ធ្វើការជម្លៀសអ្នកដំណើរចេញពីកប៉ាល់ដែលកំពុងឆាបឆេះ។ ដោយឡែក ចំពោះមូលហេតុដែលបង្កជាការឆាបឆេះនេះ នៅមិនទាន់ដឹងមូលហេតុនៅឡើយទេ ដោយខាងអាជ្ញាធរកំពុងដាក់ការស៊ើបអង្កេត៕