ឃាត់រថយន្តថៃដឹកម៉ូតូថ្មី Scoopy CLick ៤៤គ្រឿង លោតឆ័ត្រ គ្មានឯកសារពន្ធគយ និងនាំចូលនៅច្រកព្រំដែនតំបន់ម៉ាឡៃ, ក្រុមហ៊ុនថា រំលោភកម្មសិទ្ធិបញ្ញា!
បន្ទាយមានជ័យ៖ មន្ត្រីទីស្នាក់ការត្រួតពិនិត្យច្រកទ្វារ និងមន្ត្រីនគរបាលប៉ុស្តិ៍ច្រកទ្វារព្រំដែនតំបន់ម៉ាឡៃ បានឃាត់រថយន្តផ្ទុក ១គ្រឿងម៉ាកហ៊ីណូ ពាក់ស្លាកលេខ៦៣ ៣៣៤៥ ក្រុងបាងកកដែលផ្ទុកម៉ូតូថ្មីចំនួន ៤៤គ្រឿងកាលពីម៉ោង ១១ថ្ងៃត្រង់ថ្ងៃទី២ ខែធ្នូ ២០១៨នេះ។
លោក ជា សេងអាន ប្រធានទីស្នាក់ការត្រួតពិនិត្យច្រកទ្វារ តំបន់ម៉ាឡៃប្រាប់ល្ងាចថ្ងៃទី២ធ្នូថា ការឃាត់ហើយរក្សាទុកនៅនឹងតំបន់ច្រកនេះ ក៏មានការសម្របសម្រួលពីលោកព្រះរាជអាជ្ញា នៃអយ្យការអមសាលាដំបូងខេត្តបន្ទាយមានជ័យផងដែរ។
ការឃាត់នោះដោយសារគ្មានឯកសារបង់ពន្ធគយនាំចូល និងឯកសារនាំចូល ហើយក៏គ្មានឈ្មោះបុគ្គល និងឈ្មោះក្រុមហ៊ុនណាជាម្ចាស់នោះឡើយ។ ហើយមានផ្ទុកម៉ូតូទាំង ៤៤គ្រឿងនោះមានម៉ាកហុងដា CLick (Honda) និងហុងដាស្គូបពី(Honda Scoppy) សេរីឆ្នាំ២០១៩។
ទោះយ៉ាងណាលោក នេត ចន្ថា ប្រធានការិយាល័យគយ និងរដ្ឋាករច្រកព្រំដែនតំបន់ម៉ាឡៃបានប្រាប់មន្ត្រីច្រកថា ករណីខាងម្ចាស់ម៉ូតូនៅជំពាក់ឯកសារ ឬថាមិនទាន់មានឯកសារនៅឡើយ។
ចំណែកប្រភពបុគ្គលិកក្រុមហ៊ុនប្រាប់បណ្ដាលព័ត៌មានយើង កាលពីថ្ងៃទី៣ ខែធ្នូ ២០១៨នេះថា ការនាំចូលដោយបុគ្គលឯកជន ហើយមន្ត្រីគយឃុបឃិត និងលាក់ឈ្មោះផងទៀត បែបនេះបានរំលោភលើកម្មសិទ្ធបញ្ញារបស់ក្រុមហ៊ុនអិនស៊ីអិច (សិទ្ធផ្ដាច់មុខរបស់ក្រុមហ៊ុន HONDA MOTOR Co.,Ltd ចុះថ្ងៃទី២៤ កុម្ភៈឆ្នាំ២០១៧ ) ដែលការកត្រាទទួលស្គាល់សិទ្ធនាំចូល និងចែកចាយផ្ដាច់មុខផលិតផលម៉ូតូ និងគ្រឿងបន្លាសម៉ាក :HONDA. DREAM, WAVE, FUTURE, SONIC, CLICK និង HONDA Scoppy ក្នុងព្រះរាជាណាក្រកម្ពុជា របស់ក្រុមហ៊ុនអ៊ិនស៊ីអិចដែលចេញដោយក្រសួងពាណិជ្ជកម្ម។
លោកបានបន្តថា ការឃុបឃិតដោយមន្ត្រីជំនាញសមត្ថកិច្ចបែបនេះ ជាអំពើខុសច្បាប់ហើយរំលោភធ្ងន់ធ្ងរ ដល់កម្មសិទ្ធិបញ្ញារបស់ក្រុមហ៊ុន។ លោក ជា សេងអាន បញ្ជាក់ដែរករណីនេះគ្មានអ្វីចម្រូងចម្រាសឡើយ ដោយគ្រាន់តែម្ចាស់ម៉ូតូនាំចូលបង្ហាញឯកសារបែបបទ នឹងប្រគល់ ហើយអោយនាំចូលស្របច្បាប់៕ (M)
