ក្នុងពេលចូលឆ្នាំចិន ដាច់ខាតកុំជូនរបស់ ១០ យ៉ាងនេះធ្វើអាំងប៉ាវ ឬ កាដូឱ្យសោះ
ពិធីបុណ្យចូលឆ្នាំចិន ចាត់ចូលជាពិធីបុណ្យប្រពៃណីមួយសម្រាប់ក្រុមគ្រួសារមកជួបជុំគ្នា ចំណាយពេលយ៉ាងសប្បាយ ជូនអាំងប៉ាវ និង កាដូមួយចំនួន ទៅកាន់មនុស្សជាទីស្រឡាញ់របស់ខ្លួន ដើម្បីទទួលបានសំណាងល្អក្នុងឆ្នាំថ្មី ។
ជាមួយគ្នានេះដែរ ការជូនកាដូនេះមួយ គឺមិនមែនចេះតែនឹកឃើញ ចង់ទិញអ្វី ទិញនោះ តាមតែចិត្តរបស់យើងចង់នោះទេ ប្រិយមិត្តត្រូវប្រាកដថា ក្នុងឆ្នាំថ្មីគួរតែទិញរបស់ល្អដើម្បីទទួលបានសំណាងល្អផងដែរ។ ខាងក្រោមនេះ ជារបស់ ១០ យ៉ាង ដែលមិនគួរជូនមនុស្សជាទីស្រឡាញ់ ក្នុងថ្ងៃបុណ្យចូលឆ្នាំចិន ៖
១. វត្ថុមុតស្រួច
ជូនកាដូ ជាវត្ថុមុតស្រួច ដូចជា កន្ត្រៃ កាំបិតអ្វីជាដើម គឺមិនល្អនោះឡើយ ។ វត្ថុទាំងនេះ គឺតំណាងឲ្យ ការកាត់ផ្ដាច់ទំនាក់ទំនង មិត្តភាព។
២. របស់ដែលពាក់ព័ន្ធនឹងលេខ ៤
សម្រាប់ជនជាតិចិន លេខ ៤ (四 sì /srr/) គឺមានសូរស្រដៀងគ្នា ទៅនឹងពាក្យថា ស្លាប់ (死 sǐ)។ ដូច្នេះហើយ រាល់វត្ថុដែលពាក់ព័ន្ធនឹងលេខ ៤ នេះ គឺចាត់ទុកជា របស់ផ្ដល់នៅសំណាងមិនល្អ និង អប្បមង្គល។
៣. ស្បែកជើង
ស្បែកជើង ក៏ចាត់ចូលជា វត្ថុមិនល្អដែល សម្រាប់ជូនក្រុមគ្រួសារ ក្នុងថ្ងៃចូលឆ្នាំនោះ ព្រោះថា ពាក្យ «ស្បែកជើង» (鞋 xié /syeah/) មានសំឡេងដូចគ្នាទៅនឹងពាក្យ «សំណាងមិនល្អ» (邪 xié)។ បន្ថែមពីនេះទៀត ស្បែកជើង គឺជារបស់ដែលយើងជាន់ពីលើ ដូច្នេះហើយ វាមិនមែនជារបស់ល្អ សម្រាប់ជាកាដូ ក្នុងថ្ងៃមង្គលបែបនេះឡើយ។
៤. កន្សែងដៃ
ជាធម្មតា គ្រប់គ្នា ជាទូទៅ គឺជូនកន្សែងដៃគ្នា នៅពេលចប់ពិធីបុណ្យសព ដោយវាជានិមិត្តសញ្ញា នៃការលាគ្នា ជារៀងរហូត។ ដូចនេះ ការជូន កន្សែងដៃដល់នរណាម្នាក់ គឺប្រៀបបាននឹង ការលាគ្នា ជារៀងរហូតដូច្នោះដែរ។
៥. នាឡិកា
សម្រាប់ជនជាតិចិន នៅពេលនិយាយថា «ជូននាឡិកាមួយ» (送钟 sòng zhōng /song jong/) មានសំឡេងដូចគ្នា ដូចនឹងពាក្យថា «ចូលរួមពិធីបុណ្យសព» (送终 sòng zhōng) ដូច្នេះហើយ នាឡិកា ក៏មិនគួរជាជម្រើសឡើយ សម្រាប់ជូនជាកាដូ ក្នុងថ្ងៃបុណ្យចូលឆ្នាំចិននោះ។
៦. ផ្លែសារី
ជូនកាដូជាផ្លែឈើ គឺល្អហើយ ប៉ុន្តែ គួរចៀសវាង ជូនជាផ្លែ សារី ។ ផ្លែសារី ចាត់ទុកជា ផ្លែមិនល្អមួយសម្រាប់ជនជាតិចិន ។ ពាក្យចិននៃ «ផ្លែសារី» (梨 lí /lee/) មានសំឡេងដូចគ្នានឹងពាក្យ «បែកគ្នា» (离 lí)។
៧. ផ្កាដែលបានកាត់
ផ្កាដែលបានកាត់ចេញពីដើម គឺជាទូទៅ ចាត់ទុកជារបស់សម្រាប់ការកាន់ទុក្ខ ក្នុងពិធីបុណ្យសព ដូច្នេះ ដាច់ខាត កុំយកជាកាដូ សម្រាប់ថ្ងៃចូលឆ្នាំចិនឱ្យសោះ។ ជាពិសេស គឺផ្កាស្បៃរឿង និង ប្រភេទផ្កាដែលមានពណ៌ ស ព្រោះវា តំណាងឱ្យការស្លាប់។
៨. ឆត្រ
ឆត្រ ក៏មិនគួរចាត់ទុក ជារបស់ល្អ ក្នុងការជូនជាកាដូដែរ ព្រោះថា ពាក្យចិន សម្រាប់ «ឆត្រ» (伞 sǎn /san/) គឺបញ្ចេញសំឡេងដូចគ្នានឹងពាក្យ «បែកគ្នា» (散 sàn)។ ដូច្នេះ ការជូនឆត្រ ដល់នរណាម្នាក់ ប្រៀបដូចជា យើងចង់បញ្ចប់ទំនាក់ទំនងជាមួយពួកគេផងដែរ។
៩. វត្ថុដែលមានពណ៌ ស ឬ ខ្មៅ
ពណ៌ ស និង ខ្មៅ គឺជាពណ៌ដ៏សំខាន់បំផុត សម្រាប់ពិធីបុណ្យសព ដូច្នេះ គួរចៀសវៀង ជូនរបស់ដែលមានពណ៌ ២ នេះ ទៅកាន់នរណាម្នាក់ ។ គួរណាស់ តែប្រើប្រាស់ពណ៌ ក្រហមមកជំនួស ព្រោះថា ពណ៌ក្រហម គឺជាពណ៌ តំណាងឲ្យក្ដីសុខ សំណាងល្អ ដូច្នេះ របស់ដែលមានពណ៌នេះ គឺល្អបំផុត សម្រាប់ទុកជាកាដូ។
១០. កញ្ចក់
កញ្ចក់ គឺចាត់ជាវត្ថុនាំសំណាងមិនល្អមួយ ដែលប្រជាជនក្នុងតំបន់អាស៊ីភាគច្រើន មិនយកជាកាដូ សម្រាប់ជូននរណាម្នាក់ឡើយ ។ កញ្ចក់ ត្រូវបានគេ មានជំនឿជឿថា អាចទាក់ទាញ ព្រលឹងខ្មោច ព្រាយបិសាច។ មួយវិញទៀត វាគឺជារបស់ដែលងាយបែក ដូច្នេះ វាចាត់ចូលជា វត្ថុដែលនាំសំណាងមិនល្អ៕
