ចោរជំនាញខ្ពស់ គាស់បង្អួចបន្ទប់គណនេយ្យ ចូលគាស់ទូរដែក ប្រមូលយកលុយអស់ជាង១៤ម៉ឺនដុល្លារ ក្នុងក្រុមហ៊ុនផលិតឥដ្ឋ RX
ខេត្តកណ្ដាល ៖ ពិតជាថ្លើមធំមែន ក្រុមចោរដ៏ជំនាញមួយក្រុុម បានធ្វើសកម្មភាពលួចគាស់បង្អួចបន្ទប់គណនេយ្យ ក្នុងក្រុមហ៊ុនផលិតឥដ្ឋមួយកន្លែងទាំងកណ្តាលយប់ ដោយប្រើរយះពេលជាច្រើនម៉ោង ចូលរើកកាយ គាស់ទូរដែករហូតបានសម្រេច ប្រមូលយកលុយអស់ជាង១៤ម៉ឺនដុល្លារ និងសម្ភារះមួយចំនួនទៀត គេចខ្លួនបាត់ដោយសុវត្ថិភាព ទាល់តែដល់ម៉ោងបុគ្គលិកចូលមកបម្រើការងារ ហេីយចាក់សោរហើយបើកទ្វារមិនរួច ទេីបមានការសង្ស័យក៏ដេីរទៅមើលខាងក្រោយ ឃើញស្នាមគាស់បង្អួច ទើបផ្អេីលឆោឡោ រាយការណ៍ប្រាប់សមត្ថិកិច្ចប៉ុស្តិ៍ ។
ករណីចោរកម្មនេះបានកើតឡើងកាលពីវេលារំលងអធ្រាត្រ ឈានចូលថ្ងៃពុធ ទី២៩ ខែឧសភា ឆ្នាំ២០១៩នេះ នៅចំណុចក្នុងបន្ទប់គណនេយ្យ របស់ក្រុមហ៊ុនផលិតឥដ្ឋមួយ យីហោ “អអិក ហ្គ្រីន អ៉ិនដាសស្ទ្រី” (RX GREEN INDUSTRIES Co.Ltd) ដែលមានទីតាំងស្ថិតក្នុងភូមិព្រែកត្រែង ឃុំសិត្បូ ស្រុកស្អាង ខេត្តកណ្ដាល ។
បេីតាមរបាយការណ៍របស់សមត្ថកិច្ចបានអោយដឹងថា ជនរងគ្រោះឈ្មោះ ឡៅ ស៊ីហ្គុន ភេទប្រុស អាយុ៣៥ឆ្នាំ ជនជាតិខ្មែរ មុខរបរជានាយកក្រុមហ៊ុនផលិតឥដ្ឋ RX GREEN (កេីតខាងលេី) មានទីលំនៅក្រុងភ្នំពេញ ។ បាត់បង់លុយដុល្លារចំនួន១៤៥,១០០ដុល្លារ (ដប់បួនម៉ឺនប្រាំពាន់មួយរយដុល្លារ) និងសម្ភារមួយចំនួន ។
យោងតាមសកម្មភាពនៅក្នុងកាមេរ៉ាសុវត្ថិភាព ដែលបុគ្គលិកក្រុមហ៊ុនម្នាក់ ធ្វេីការបំភ្លឺប្រាប់ឲ្យសមត្ថកិ្ចច្ចបានដឹងថា ៖ នៅវេលាម៉ោង០២:៥៥នាទីទាបភ្លឺ ថ្ងៃទី២៩ ខែឧសភា ឆ្នាំ២០១៩ មានជនមិនស្គាល់ បានធ្វេីសកម្មភាពគាស់បង្អួចបន្ទប់ដាក់ទូរដែក (មើលតាមកាមេរ៉ាសុវត្ថិភាព) ។ ប្រភពបន្តថា លុះរហូតមកដល់វេលាម៉ោង០៧:១៥នាទីព្រឹកថ្ងៃដដែលនេះ បុគ្គលិកបានចូលមកបំរេីការងារដូចសព្វដង ហេីយនៅពេលចាក់សោរទ្វាររួច ទ្វារបេីកមិនរួចទេ ទេីបមានការសង្ស័យ ហេីយក៏នាំគ្នាទៅមេីលខាងក្រោយ ឃេីញស្នាមគាស់បង្អួច ទើបផ្អេីលឆោឡោ និងរាយការណ៍ប្រាប់សមត្ថិកិច្ចប៉ុស្តិ៍សត្បូបានដឹងផងដែរ ។
បន្ទាប់ពីទទួលបានព័ត៌មាននេះភ្លាម កម្លាំងជំនាញពាក់ព័ន្ធ នៃស្នងការដ្ឋាននគរបាលខេត្តកណ្តាល ចុះទៅពិនិត្យមើលស្លាកស្នាម ដែលបានបន្សល់ទុកនៅកន្លែងកេីតហេតុ ដេីម្បីធ្វេីការស្រាវ កំណត់មុខសញ្ញា តាមចាប់ក្រុមចោរដ៏ជំនាញនេះ យកមកផ្តន្ទាទោសតាមផ្លូវច្បាប់អោយខានតែបាន៕ ដោយបងម៉េង
