បុរសម្នាក់ខ្ទាតផ្លោងបាក់ដៃចេញឆ្អឹង ព្រោះតែបុរសស្រវឹងស្រា បេីកអាព្រូស លឿនដូចហោះទៅបុក ហេីយបេីករត់ ហេីយផ្ទុះកង់ទៅមុខលែងរួច អ្នកភូមិស្ទាក់ព័ទ្ធជិត ផ្អេីលសមត្ថកិច្ចខណ្ឌមានជ័យ ចុះវាយខ្នោះនាំម្ចាស់រថយន្តបង្ក ចេញមកប៉ុស្តិ៍ វាស់ជាតិអាកុល ០,៩០ក្នុង១លីត្រខ្យល់!
រាជធានីភ្នំពេញ ៖ ករណីគ្រោះថ្នាក់ចរាចរណ៍ដោយបុរសម្នាក់ស្រវឹងស្រា បានបើករថយន្តយ៉ាងលឿនជ្រុលចង្កូតទៅបុក ម៉ូតូពេញទំហឹងដួលបោកទៅលើថ្នល់ បណ្តាលឲ្យអ្នកជិះម៉ូតរងរបួសបាក់ដៃ ចេញឆ្អឹងមកក្រៅ ព្យាយាមបើករថយន្តរត់គេច បានចម្ងាយប្រហែល ១០០ម៉ែត្រ បង្កការភ្ញាក់ផ្អើលដល់ប្រជាពលរដ្ឋអស់មួយភូមិ មកស្ទាក់ចាប់បាន រួចមិនព្រមឲ្យសមត្ថកិច្ចនាំមកប៉ុស្តិ៍ទេ ដោយបានរារាំងសមត្ថកិច្ចបំណងទាមទារឲ្យសមត្ថកិច្ចវាស់រកជាតិអាកុលក្នុងខ្លួនជនបង្ក ទេីបសមត្ថកិច្ចសុំកម្លាំងអន្តរាគមន៍ចុះមកវាយខ្នោះ នាំជនបង្កចេញពីកន្លែងកើតេហតុ ដោយសារខ្លាចក្រែងកើតមានហិង្សាជាយថាហេតុ។
ហេតុការណ៍គ្រោះថ្នាក់ចរាចរណ៍បង្កការភ្ញាក់ផ្អេីលពេញភូមិកើតឡើងកាលពីវេលាម៉ោង១០:០៥នាទីយប់ ថ្ងៃទី២៩ ខែឧសភា ឆ្នាំ២០១៩ តាមបណ្ដោយផ្លូវដួងងៀប ជិតរោងចក្រសេះស សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។
ជនរងគ្រោះជិះម៉ូតូម៉ាក ហុងដាឌ្រីម (Honda Dream) ស៊េរីឆ្នាំ២០១៤ ពណ៌ខ្មៅ ពាក់ស្លាកលេខភ្នំពេញ 1CH-6074 ធ្វើដំណើរពីជើងទៅត្បូង។ ជនបង្កបើករថយន្តម៉ាក តូយ៉ូតាព្រូស (TOYOTA PRIUS) ពណ៌ស ពាក់ស្លាកលេខភ្នំពេញ 2BA-6069 មានវ័យប្រហែល ៤០ឆ្នាំ។
សាក្សីដែលឃើញហេតុការណ៍ផ្ទាល់បានរៀបរាប់ប្រាប់ថា នៅមុនពេលកើតហេតុ ជនរងគ្រោះធ្វើដំណើរបញ្ជ្រាសទិសគ្នាជាមួយជនបង្ក ស្រាប់តែធ្វើដំណើរមកដល់កន្លែងកើតហេតុ រថយន្តបង្កបើកយ៉ាងលឿន ក៏ជ្រុលចង្កូតទៅបុកម៉ូតូពេញទំហឹង បណ្តាលឲ្យអ្នកជិះម៉ូតូ រងរបួសដាច់កដៃឆ្វេងសន្លប់ស្តូក ចំណែកម៉ូតូខ្ទាតទៅចិញ្ចើមផ្លូវ បន្ទាប់ពីបង្កហេតុរួចព្យាយាមបើករថយន្តរត់គេច បានចម្ងាយប្រហែល ១០០ម៉ែត្រ បង្កការភ្ញាក់ផ្អើលដល់ប្រជាពលរដ្ឋអស់មួយភូមិ មកស្ទាក់ចាប់បាន រួចទាមទារឲ្យសមត្ថកិច្ចវាស់រកជាតិអាកុលក្នុងខ្លួនជនបង្ក និងរង់ចាំសាច់ញាតិជនរងគ្រោះ មកដល់កន្លែងកើតហេតុសិន មុននាំទៅកាន់ប៉ុស្តិ៍នគរបាលរដ្ឋបាល។
សូមបញ្ជាក់៖ ភ្លាមៗនោះលោកវរសេនីយ៍ទោ ម៉េង វិមានតារា អធិការនគរបាលខណ្ឌមានជ័យ បានបញ្ជាឲ្តកម្លាំងអន្តរាគមន៍ខណ្ឌមានជ័យ បានចុះទៅវាយខ្នោះ នាំជនបង្កចេញពីកន្លែងកើតេហតុ ដោយសារខ្លាចក្រែងកើតមានហិង្សាជាយថាហេតុ និងនាំមកស្នាក់ការប៉ុស្តិ៍រដ្ឋបាលស្ទឹងមានជ័យទី៣ ធ្វេីការត្រួតពិនិត្យជាតិអាកុល ដោយរកឃេីញមានជាតិអាកុល ០,៩០មិល្លីក្រាម ក្នុង១លីត្រខ្យល់ កម្រិតឃាត់ខ្លួន និងរងចាំប្រគល់អោយជំនាញចរាចរណ៍ ឃាត់ខ្លួនយកការិយាល័យចរាចរណ៍ក្រុង។
សូមបញ្ជាក់ថាច្បាប់ចរាចរណ៍ផ្លូវគោកថ្មី មាត្រា៧៧ បានចែងដូចខាងក្រោម ៖ មាត្រា៧៧ ជនណាបើកបរយានយន្តនៅពេលដែលខ្លួនស្ថិតក្នុងភាពស្រវឹង ដោយមានជាតិអាល់កុលចាប់ពី 0,40 (សូន្យក្បៀសសែសិប) មីលីក្រាមក្នុងមួយលីត្រខ្យល់ ឬចាប់ពី 0,80 (សូន្យក្បៀសប៉ែតសិប) ក្រាមក្នុងមួយលីត្រឈាម ឡើងទៅ ត្រូវផ្ដន្ទាទោស ដាក់ពន្ធនាគារពី ១ខែ ទៅ ៦ខែ និងពិន័យជាប្រាក់ ៨០០,០០០ រៀល (ប្រាំបីសែនរៀល) ទៅ ៤០០០,០០០ រៀល (បួនលានរៀល)។
មាត្រា៨៣ ជនណាបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្នឬមិនគោរពកាតព្វកិច្ចដែលបទប្បញ្ញត្តិស្តីពីចរាចរណ៍ផ្លូវគោកតម្រូវបណ្ដាលឲ្យមានរបួសដល់អ្នកដទៃហើយបណ្ដាលឲ្យអ្នករងគ្រោះ អសមត្ថភាពធ្វើការងារ ក្នុងរយៈពេលស្មើ ឬលើសពី៨ថ្ងៃ គិតពីថ្ងៃកើតហេតុ គឺត្រូវផ្ដន្ទាទោស ដាក់ពន្ធនាគារពី៦ខែ ទៅ២ឆ្នាំ និងពិន័យជាប្រាក់ពី ២០០០,០០០រៀល (ពីរលានរៀល) ទៅ ១០,០០០,០០០រៀល (ដប់លានរៀល) ។
បច្ចប្បន្នរថយន្តបង្ក និងម៉ូតូរបស់ជនរងគ្រោះ ត្រូវបានសមត្ថកិច្ចមូលដ្ឋានប៉ុស្តិ៍ស្ទឹងមានជ័យទី៣ សហការជាមួយផ្នែកវាស់វែងនៃអធិការដ្ឋានខណ្ឌមានជ័យ ប្រគល់ឲ្យសមត្ថកិច្ចជំនាញ ចុះមកវាស់វែង និងស្ទូចយកទៅរក្សាទុកបណ្ដោះអាសន្ន នៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំដោះស្រាយតាមច្បាប់ រីឯជនរងគ្រោះ ត្រូវបានបញ្ជូនទៅសង្រ្គោះ នៅឯមន្ទីរពេទ្យ៕ ដោយបងម៉េង
